Дэлхийн аз жаргалын тайланд Монгол Улс 109 орноос 61 дүгээрт бичигдэв
Финланд улс 6 дахь жилдээ “Хамгийн аз жаргалтай улс”-аар шалгарлаа. Финланд улс Дэлхийн хамгийн аз жаргалтай орноор зургаа дахь жилдээ дараалан шалгарсан нь урьд өмнө байгаагүй амжилтад тооцогдож байна.
НҮБ-ын Тогтвортой хөгжлийн шийдлийн сүлжээнээс эрхлэн гаргадаг Дэлхийн аз жаргалын 2023 оны тайланд Финланд, Дани, Исланд улс жагсаалтыг тэргүүлжээ. Финланд улсын хувьд жагсаалтад багтсан бусад улсаас оноогоороо мэдэгдэхүйц зөрүүтэй байгааг тайланд онцолж байна.
Харин Монгол Улс нийт 109 улсаас Тайландын дараа, Киргизийн өмнө 61 дүгээрт бичигдсэн байна. Өнгөрсөн онд Монгол Улс авлигын түвшнээр тааруу үзүүлэлтээ хадгалж, “Авлигын төсөөллийн индекс”-д зургаан байр ухран 180 улсаас 116 дугаарт бичигдэж байсны сацуу "IQAir"-аас гаргасан дэлхийн хотуудын агаарын чанарын үнэлгээнд Улаанбаатар хот бохирдлоороо дэлхийн 7323 хотоос 464 дүгээрт эрэмбэлэгдсэн юм.
Энэ мэтээр хүн амын аз жаргалын түвшнийг илтгэх гол үзүүлэлтүүдэд Монгол Улс төдийлөн том ахиц дэвшил гаргаж чадаагүй хэвээр байна.
Дэлхийн аз жаргалын тайланд аз жаргалын түвшнийг тодорхойлохдоо нэг хүнд ногдох дотоодын нийт бүтээгдэхүүн, нийгмийн халамж, дундаж наслалт, иргэний эрх чөлөө, авлигын түвшин, ажлын байрны баталгаа, олон нийтийн санал асуулгын дүн зэрэг үзүүлэлтийг харгалздаг.
Энэ оны тайлангаас харвал Литва улс хамгийн олон байр урагшилсан байна. Тус улс 2017 оноос хойш 30 байраар урагшилж, одоо 20 дүгээрт бичигдэж байгаа юм. Мөн Израил улс өнгөрсөн оноос таван байраар урагшилж, дөрөвдүгээрт эрэмбэлэгджээ.
