Я.Санжмятав: Би хүний нөлөөгөөр ажилладаг хүн биш

Хөдөлмөрийн яамаар дамжуулан Хөгжлийн банкны эх үүсвэрээр ЖДҮ-ийг хөгжүүлэх зорилгоор олон зээл олгосон. Иймд Хөгжлийн банкны сонсголд Хөдөлмөрийн сайд асан С.Санжмятав оролцож байна. УИХ-ын гишүүн Ц.Мөнхцэцэг "Зээл олголтод төр хатуу хяналт тавьж чадаагүй гээд Баянзүрх дүүрэгт хамгийн их үнийн дүн бүхий зээлүүдийг олгосон байна" гэв. С.Санжмятав: -Би хүний нөлөөгөөр ажилладаг хүн биш. Хөгжлийн банкны эх үүсвэрээр зээл олгохдоо ААН-үүдийг 30 хүний бүрэлдэхүүнтэй баг ажиллаж, сонгон шалгаруулсан. Би хартай эхнэр шиг энэ хүмүүст нэлээн хяналт тавьж ажилласан. Аль болох гаднын нөлөөгүйгээр шийдвэр гарсан. Манай яамаар дамжуулан 100 ААН зээл авсан гэвэл 95 нь төлсөн байх учиртай. Бид шалгуурын дагуу сонгон шалгаруулсан. Баянзүрх дүүрэгт хамгийн өндөр дүнтэй зээлүүд байгаа нь тус дүүрэгт олон ЖДҮ байдагтай холбоотой байх. Өөр сэдэл байхгүй. Би сайд болоод нэг зээлийн дээд хэмжээг бууруулсан. 11 тэрбум төгрөгийн зээл ч олгосон байв. Хоёр ажилтантай бол гурван хүнтэй болог хэмээн жижиг бизнесүүдийг түлхүү дэмжсэн гэв. Тэрээр 2012-2014 онд Ерөнхий сайд Н.Алтанхуягийн танхимд багтан, Хөдөлмөрийн сайдаар ажилласан юм.