Ж.Сүхбаатар: Сонсголд оролцож байгаа зарим хүн илэрхий худлаа ярьж байна лээ
Нотлох баримтыг шинжлэн судлах сонсголын гурав дахь шат Төрийн ордноо өнөөдөр дөрөв дэх өдрөө үргэлжилж байна. Өнөөдрийн сонсголоор арилжааны банкуудаар дамжуулан олгосон гурван багц зээлийн асуудлыг авч хэлэлцэх бөгөөд төслүүдтэй холбоотойгоор 78 гэрч оролцуулахаар дууджээ.
Экспортыг дэмжих, импортыг орлох үйлдвэрлэлийн 888 төслийг хэлэлцэж байна.УИХ-ын гишүүн Ж.Сүхбаатар “Үр дүн их чухал, экспортод гарсан уу, импортыг оролсон уу гэдэг юмыг Цогтгэрэл гишүүн хэлж байна. Гэтэл шинжээчийн дүгнэлт дээр үр дүнгийг нь тооцох асуудал хангалтгүй байсан гээд байгаа. Материал, тайлан хангалтгүй байна гэж байна. Яагаад материал дутаж, алга болчихов гэдгийг асуумаар байна. Сонсголд оролцож байгаа зарим хүн илэрхий худлаа ярьж байна. О.Цогтгэрэл бодлого нь зөв байсан хэрэгжүүлэхдээ алдчихсан гэж байх юм. Гэтэл тухайн үед бодлого нь өөр байсан. Төсвийн чанартай хийгдэх ажлууд руу тарааж, эвдэж хаясан байхгүй юу. Тэгэхээр бодлого зөв байсан, хэрэгжүүлэхдээ буруу байсан гэдэгтээ санал нийлэхгүй байна” гэв.УИХ-ын гишүүн О.Цогтгэрэл “Бодлогын хувьд алдаатай байсан гэж Ж.Сүхбаатар гишүүн хэлж байна. Төрөөс эдийн засагт оролцох нь өөрөө сайн зүйл биш. Гэхдээ тухайн үед өөр боломж байсан уу гэдгийг бодолцож үзэх ёстой. 2017 оны ЖДҮ-ийн хэрэг дээр л жинхнээсээ албан тушаалтнуудын нөлөө асуудал явагдсан шүү дээ” гэж хариулав.
