Х.Нямбаатар: Цахим паспорт нууцлалын бүх шаардлагыг хангасан

Цахим паспортыг гуравдугаар сарын 1-нээс олгож эхэлсэн. Үйл ажиллагааны албан ёсны нээлт өнөөдөр /2023.03.15/ болж байна. Цахим гадаад паспорт нь чиптэй учраас олон улсын нисэх буудал, хил гааль дээр байршсан төхөөрөмж таньж унших боломжтой тул хилээр түргэн шуурхай нэвтрэх давуу талтай аж.Хууль зүй, дотоод хэргийн сайд Х.Нямбаатар"Өнөөдрөөс цахим гадаад паспорт олгох ажил албан ёсоор эхэлж байна. Анхны захиалгыг өгсөн иргэдэд цахим гадаад паспортыг гардууллаа. Цахим үндэстэн болох хамгийн том ажил бол энгийн гадаад паспортыг чиптэй, цахим болгон шилжүүлж буй үйл явдал юм. Зургадугаар сарын 1-ний өдрөөс эхлэн Чингис хаан нисэх онгоцны буудалд цахим гарц нэвтрүүлнэ. Мөн иргэд хүнтэй огт харьцахгүй цахим хаалгад паспортоо уншуулаад хилээр нэвтрэх боломжтой болно. Эхний ээлжид Монгол Улсын 37 боомтоос гурвыг нь цахим хаалгатай болгоно. Шинэ паспорт 48 хуудастай. Хуудас нь төрийн тахилгат уул, улаан номд орсон амьтдын зурагтай. Нууцлалын бүх шаардлагыг хангасан тул зураг солих, нэр хуурамчаар үйлдэх зэрэг ямар ч боломжгүй. Улсын бүртгэлийн бүх байгууллагаар цахим гадаад паспортыг олгож байна. Заавал шинэ паспортыг авах шаардлагагүй өмнөх паспортоо ашиглаж болно. Магадгүй, паспортын хугацаа нь дууссан бол энгийн болон цахим гадаад паспортоос өөрөө сонгоод захиалах боломжтой юм" гэв.