Техник, хяналтын үзлэгтээ оруулаагүй тээврийн хэрэгслүүдийг өнөөдрөөс тоолно

ЗТХЯ, Авто тээврийн үндэсний төв, Замын хөгжлийн газраас авто замын даац хэтрүүлэлтийн хяналт шалгалт, авто зам дагуух үйлчилгээний цогцолборын сонгон шалгаруулалт, тээврийн үнэ ханшийн талаар мэдээлэв.Авто тээврийн Үндэсний төв ТӨҮГ-ын Тээврийн хэрэгслийн бүртгэлийн хэлтсийн дарга Н.Бямбадорж “Тээврийн хэрэгслийн шинэчилсэн бүртгэлийг эхлүүлсэн. 2022 оны арванхоёрдугаар сарын 31-ны өдрийн байдлаар бүртгэлийн санд 1.2 сая тээврийн хэрэгсэл бүртгэлтэй байлаа. Үүнээс 800 мянга нь техник, хяналтын үзлэгт оржээ. Үлдсэн 460 гаруй мянга нь техник, хяналтын үзлэгтээ ороогүй. Тав буюу түүнээс жил техник, хяналтын үзлэгтээ ороогүй бол бүртгэлээс хасах журамтай. Тэгэхээр эдгээрийг эцэслэн тогтоох зорилгоор шинэчлэн бүртгэж байна. Жолооч нар  олон жилийн өмнө ашиглахгүй болсон тээврийн хэрэгслээ шинэчилсэн бүртгэлээр хасуулах боломжтой. Шинэчилсэн бүртгэлээр иргэдээс төлбөр авах, чирэгдэл учруулахгүй. Шинэчилсэн тооллого өнөөдөр эхэлнэ. Хаяг байршил тодорхой тээврийн хэрэгслийг дахин тоолохгүй. Тухайн тээврийн хэрэгслийг үзлэгт оруулаагүй шалтгааныг тодруулна. Живсэн, шатсан гэх мэт шалтгаанаар дахин ашиглах боломжгүй болсон тээврийн хэрэгслийг хасуулж болно. Хялбаршуулсан журмаар, түргэн хугацаанд хасна" гэв. 153 мянган тээврийн хэрэгслийг бүртгэлээс хассан тул 300 орчим мянган тээврийн хэрэгслийг тоолох юм байна.