ОХУ өчигдөр Украин руу 81 пуужин харважээ

ОХУ өчигдөр Украины хотууд руу өргөн хүрээтэй пуужингийн довтолгоо үйлдсэн. Тэгвэл довтолгооны тоон мэдээлэл өнөөдөр тодорхой болжээ. Мэдээлэл нь ВВС агентлагт гарсан байна. ОХУ өчигдөр Одесс, Харьков тэргүүтэй хотууд руу нийт 81 пуужин харвасны дотор “Кинжал” хэмээх пуужин байсан аж. 8 метр урттай энэ пуужин ПЭХС-ийн эсэргүүцлээс зайлсхийх чадвартай юм.

ОХУ сүүлийн хэдэн сар энэ зэвсгийг Украинд хэрэглээгүй байсан аж. Довтолгооны дүнд есөн хүн амиа алджээ.

ОХУ-ын Батлан хамгаалах яамны хэвлэлийн төлөөлөгч Игорь Конашенков өчигдөр хийсэн мэдэгдэлдээ "Кинжал" хэт авианы пуужин Украины эрчим хүчний дэд бүтцийн гол байгууламжуудыг онилж, амжилттай оносон" гэжээ. Өчигдрийн довтолгоо нь сүүлийн хэдэн долоо хоногт хийсэн хамгийн ширүүн дайралт байсан гэдгийг Украины тал онцолж байна. Украины арми өчигдөр ОХУ-ын харвасан 34 далавчит пуужин, Иранд үйлдвэрлэсэн дөрвөн ширхэг “Шахед” нисэгчгүй онгоцыг агаар дээр угтан сөнөөжээ. Харин зургаан “Кинжал”-ыг замд нь устгаж чадаагүй аж.