Орон даяар өрнөж буй "Музейн нээлттэй өдрүүд"-ийн эхний хоёр өдөр улсын хэмжээнд 33 702 хүн музей үзжээ.
Тэд үндэсний түүх, соёл, өв, уламжлал, ёс заншлын сэдэвтэй тусгай үзэсгэлэн үзэж, боловсролын хөтөлбөрт хамрагдсан байна. Харин "Чингис хаан" үндэсний музейгээр өчигдөр нийт 4128 иргэн үйлчлүүлснээс 1683 буюу 40 гаруй хувь нь насанд хүрэгсэд байжээ. Тус өдөр музейгээс явуулдаг боловсролын хөтөлбөрүүдэд нас насны нийт 146 хүн хамрагдсан байна. Эхний өдөр тус музейгээр нийт 2007 хүн үйлчлүүлснээс 30 хувь нь хүүхэд байв. Тус музей "Музейн нээлттэй өдрүүд"-ээр гуравдугаар сарын 5-ныг хүртэл өдөр бүр 9.00-16.00 цаг хүртэл цагийн хуваарийн дагуу үзэгчдэдээ үнэ төлбөргүй үйлчилж буй юм. Музейн зай талбай, багтаамжаас шалтгаалан ачаалал их үүсэж буй тул иргэдийг зөв боловсон, соёлтой, хүлээцтэй үйлчлүүлэхийг музейн хамт олон санууллаа. Түүнчлэн музейн онцлог, үзмэрийн тоо хэмжээнээс шалтгаалан сүүлийн үзэгчийг музей хаахаас хамгийн багадаа нэг цагийн өмнө оруулдаг болохыг сануулсан юм.
