Б.Нарантуяа Snooker-ын дэлхийн аваргын шөвгийн наймд шалгарлаа
Эмэгтэйчүүдийн Snooker-ын дэлхийн аварга шалгаруулах тэмцээн Тайланд Улсын Бангкок хотод үргэлжилж байна. 12 улсын 50 тамирчин оролцсон тэмцээний шөвгийн найм өчигдөр тодроход Монголын 28 настай Б.Нарантуяа багтлаа.
Шигшээ 32-т Энэтхэгийн тамирчныг 3-1 харьцаагаар хожсон Б.Нарантуяа шөвгийн 16-д гурван удаагийн дэлхийн аварга Хонконгийн Нг Он Ийг 4-2 харьцаагаар хожиж таамаг эвджээ.
Дэлхийн аваргад оролцсон Монголын дөрвөн тамирчны нэг, дэлхийн аваргад анх удаа оролцож буй тэрээр урьдчилсан шатанд 2017 оны мөнгөн медальт Видяа Пиллайг ялж шуугиан тариад байв.
Түүний шөвгийн наймын өрсөлдөгч нь дэлхийн чансааны 5-т бичигдэж буй Английн Жеми Хантерыг ялсан Тайландын Сирипапорн Нуантхамжам юм.
Тэмцээн Бангкокийн цагаар өнөөдөр 10:00 цагт үргэлжилсэн.
