Төрийн ордонд болж буй “Шилэн нам” эрдэм шинжилгээний хуралд Ерөнхий сайд, МАН-ын дарга Л.Оюун-Эрдэнэ оролцлоо.
Тэрээр энэ үеэрээ, “Засгийн газраас 2023 оныг “Авлигын эсрэг жил” болгон зарлаж, системийн авлигатай тэмцэх “5 Ш” ажиллагааг хэрэгжүүлж эхлээд байна. Авлигын хөрсөнд ургасан хогийн ургамлыг таслах ажлыг Засгийн газар эхний “4 Ш” буюу шүгэл үлээх, шүүр, шувуу, шилжүүлэн авах ажиллагааны хүрээнд олон нийтийн дэмжлэгтэйгээр далайцтай шийдвэрлэж чадна гэдэгт итгэлтэй байна. “Шувуу” ажиллагааны хүрээнд ирэх долоо хоногийн Засгийн газрын хуралдаанаар хууль хяналтын байгууллагад шалгагдаж байх явцдаа хилийн чанадад оргон зайлсан этгээдүүдийн нэрсийг зарлаж, иргэний гадаад пасспортын үйлчлэх хугацааг цуцалж, хүчингүй болгох асуудлыг хэлэлцэж, шаардлага тохиолдолд Улсын Их Хуралд оруулна” гэсэн юм. Мөн тэрээр, “Үндсэн хууль өөрчлөгдөж, холимог тогтолцоонд ороод, сонгуулийг зайлшгүй намар хийх шаардлагатай байна гэвэл ээлжит бус сонгуулиас татгалзахгүй. Үндсэн хуульд өөрчлөлт орохгүй бол ээлжит бус сонгууль хийх боломжгүй” гэж мэдэгдлээ.
