Азийн физикийн олимпиадыг 3.2 тэрбум төгрөгийн зардлаар Улаанбаатарт зохионо

Засгийн газрын өнөөдрийн /2023.02.20/ хуралдаанаар Азийн физикийн 23 дугаар олимпиадыг Улаанбаатар хотод зохион байгуулахаар шийдвэр гаргажээ. Олимпиад ирэх тавдугаар сарын 22-30-ны өдрүүдэд болох бөгөөд нийт 18 орны 140 сурагч, 54 профессор багш оролцох төлөвлөгөөтэй байгаа аж. Энэхүү арга хэмжээг зохион байгуулах ажлын хэсгийг БШУ-ын сайд Л.Энх-Амгалан ахална. Мөн олимпиадыг зохион байгуулах зардал болох 3.2 тэрбум төгрөгийн санхүүжилтийг шийдвэрлэхийг Сангийн сайдад үүрэг болгов. Энэхүү олимпиад нь физикийн боловсролын чанарыг үнэлэх, физикт авьяастай, ирээдүйтэй хүүхэд залуусыг хөхүүлэн дэмжих, мэргэжлийн түвшинд ахих боломж олгох, бүс нутгийн соёлын олон янз байдалтай танилцах, монгол өв соёлоо сурталчлах, түгээн дэлгэрүүлэх, олон улсын хамтын нийгэмлэгт байр сууриа бэхжүүлэн хөгжүүлэх чухал ач холбогдолтой аж.