Зарим хэвлэл мэдээллийн хэрэгслээр “Баянзүрх дүүрэг нэг автобусны буудлыг 295 саяар тохижуулна” гэсэн мэдээлэл гарсан. Энэ ажил зөвхөн нэг автобусны буудлыг тохижуулах тухай биш юм. Харин дүүргийн 23 дугаар хорооны автобусны эцсийн буудлыг тохижуулах цогц ажил аж.
Баянзүрх дүүргийн 23 дугаар хороо нь дүүргийн алслагдмал хороодын нэг. Энэ нь хорооны иргэд автобус их хүлээдэг, хүйтэнд даардаг, түгжрэл их үүсдэг гэдэг асуудлыг тавьж, санал хүсэлтээ ирүүлдэг. Иймд холбогдох байгууллагатай ярьж автобусны тоо, чиглэлийг нэмэхээр болсон байна. Тус ажилтай холбоотойгоор автобусны эцсийн буудлыг цогц байдлаар тохижуулах шаардлага гарчээ. Тухайн байршилд буюу нийт 4379 м.кв талбайд:
- Монос, улиас, нарс, хайлаас, шар хуайс тарьж, ногоон байгууламж бий болгоно
- Сандал
- Явган зам талбай
- Гэрэлтүүлэг
- Саравч
- 20 авто машины ил зогсоол
- Автобусны хоёр буудал гэх мэт цогц ажил хийгдэнэ. Энэ ажлыг Баянзүрх дүүргийн Хөрөнгө оруулалт бүтээн байгуулалтын төвийн хамт олон хийж гүйцэтгэхээр болжээ.
Автобусны эцсийн буудлыг тохижуулах ажил 23 дугаар хорооноос гадна 14 дүгээр хороо Халдвартын эцэс, 9 дүгээр хороо Шархадны эцэс, 20 дугаар хороо Гачууртын эцсийн буудлууд дээр хэрэгжих юм. Цогц ажлыг хийхдээ иргэдээс санал авч, автобусны буудлын чиглэл, нөхцөл байдал дээр үндэслэн, судалгаа хийн, зураг төслийг боловсруулсан. Автобусны эцсийн буудлуудыг ийнхүү цогц байдлаар тохижуулснаар төлөвлөлт сайжирна, автобусны эргэлт нэмэгдэнэ, түгжрэл тодорхой хувиар буурахаас гадна иргэд эрүүл, аюулгүй орчинд амьдрах боломжтой зэрэг олон талын ач холбогдолтой юм байна.
