“Эрдэнэт"-ийн удирдлагууд уулын аманд үр ашиггүй тансаг зочид буудал барьж байна"

“Эрдэнэт үйлдвэр” ТӨҮГ-ын удирдлагуудын хууль зөрчсөн, улсын төсөвт төвлөрүүлэх ёстой хөрөнгөөр үр ашиггүй зочид буудал барьсан талаар экологич Д.Туяа мэдээлэл хийлээ. Тэрбээр "“Эрдэнэт үйлдвэр” ТӨҮГ-ын удирдлагууд Булган аймгийн Хангал сумын нутаг дэвсгэрт Эрдэнэт хотоос 70 гаруй километрийн зайд уулын аманд 210 ортой, тансаг зэрэглэлийн зочид буудал барьж байна. Энэ ажлыг бид анхнаас нь эсэргүүцэж 2021, 2022 онд зогсоох гээд дийлэхгүй энэ оны нүүрийг үзлээ. Улс орны эдийн засаг сайн биш байна. Хүн бүр өрхийн орлогоо дээш татахын тулд бүгд л хичээж байгаа. Гэтэл "Эрдэнэт" ТӨҮГ-аас улсын төсөвт төвлөрөх мөнгөөр ийм барилга барих шаардлагагүй. Энэ бол үр ашиггүй зардал. "Тэрбум мод хөтөлбөрийн хүрээнд сая мод тарина. Гадаадаас өндөр мэргэжилтнүүдийг төлбөр төлж авч ирнэ. Энэ хүрээнд сургалт явуулна. Энэ бол тухайн сургалтыг зохион байгуулах ногоон хөгжлийн төв" гэдэг зүйлийг хэлдэг. Гэтэл уулын мухарт хэн очиж сургалт хийх вэ. Ийм инээдтэй зүйл ярьж, хөдөөгийн хууль мэдэхгүй иргэдийг далимдуулж худал хэлж байна. Аль 2020 онд ажил нь эхэлчихсэн, яам тамгын газраар зөвшөөрлөө хөөцөлдөж байсан шүү дээ. Гэтэл "Тэрбум мод" хөтөлбөр 2021 онд эхэлсэн. Уснаас хуурай гарахын тулд гадаадын эрдэмтдээс сургалт авна гэж ямар ч үндэслэлгүй худлаа ярьж байна" гэлээ. Мөн тэрбээр "Би экологич хүн. Гаднаас өндөр үнэ төлж хүмүүс авч ирж, тэдний заавраар мод тарина гэж болохгүй. Манай орны газарзүйн онцлог өөр, эрс тэс дөрвөн улиралтай. Тэгэхээр өөрсдийн ойн инженер, экологичдын мэдлэгийг ашиглаж болно шүү дээ" гэдгийг нэмж дурдлаа.