Нүүрсний гэх хэрэгт холбогдуулан ХНХ-ын сайд Т.Аюурсайхан, УИХ-ын гишүүн Д.Бат-Эрдэнэ нарыг яллагдагчаар татах саналыг АТГ-аас прокурорт хүргүүлсэн байна.
Т.Аюурсайхан сайдын хувьд: Түүнтэй холбоотой хэд хэдэн хүнийг хуулийн байгууллагаас шалгаад эхэлсэн. Тухайлахад, түүний туслах асан И.Даваадоржийг нүүрсний асуудлаар саатуулсан. Хамаарал бүхий гэдэг утгаар нь "Эрхэт Монгол" группийн Ерөнхийлөгч Х.Мандахбаяр нарын гэр болон албан оффисуудад нэгжлэг зохион байгуулсан байдаг. Цаашлаад ЭТТ-н Гүйцэтгэх захирал асан Б.Ганхуягтай ойр харилцаатай, тус компаниас саатуулагдсан Ж.Отгонбаатар түүний туслахаар ажиллаж байсан зэрэг шалтгаанаар зайлшгүй шалгагдах ёстой хүмүүсийн нэгээр нэрлэгдэж буй. Гэвч Т.Аюурсайхан сайд өөрийн цахим хуудаснаа "Нүүрсний хэргээр шалгагдах үндэслэл надад байхгүй" хэмээн мэдэгдсэн удаатай.
Д.Бат-Эрдэнэ гишүүний хувьд: Т.Аюурсайхантай мөн л адил хамаарал бүхий гэдэг шалтгаанаар хэд хэдэн хүнийг шалгаад эхэлчихсэн. Тухайлахад, Өмнөговь аймгийн Засаг дарга Р.Сэддоржийг шалгаж, Д.Бат-Эрдэнэтэй уулзахыг хориглосон шүүхийн шийдвэр хүртэл гарчихсан. УИХ-ын гишүүн Д.Бат-Эрдэнэ нь орон нутгийн жижиг Тавантолгойн нүүрсийг олборлосон, зөөсөн хэрэгтэй холбоотойгоор хардагдаж ирсэн билээ.
