Хаврын чуулган нээсний дараа УИХ-ын гишүүдийн олонх дэмжвэл Ж.Мөнхбатыг чөлөөлнө

УИХ-ын гишүүн Ж.Мөнхбат бүрэн эрхээсээ татгалзах хүсэлтээ өгчээ. Түүний эл үйлдэл нүүрсний хулгай, ҮХНӨ-ийн асуудал өрнөж байх үестэй давхцав. Мөн намрын чуулган хаалтаа хийсний дараа таарлаа. Өөрөөр хэлбэл, энэ нь хаврын чуулган эхэлмэгц хэлэлцэгдэхээс гадна улмаар улс төрийн өрнөлд зарим талаар нөлөөлөх дүр зураг харагдаж буй.

Тэгвэл, хуулийн зохицуулалтын хувьд Ж.Мөнхбат өөрийн хүсэлтээр гишүүнээс чөлөөлөгдөхийн тулд ямар процесс өрнөх талаар мэдээлье.

Уг асуудлын суурь заалт нь УИХ-ын тухай хуулийн 10 дугаар зүйлийн 1.2 дахь хэсэгт бий. Тодруулбал, тус хуулийн 10.1.2-т “Хүндэтгэн үзэх шалтгаанаар чөлөөлөгдөх хүсэлтээ өөрөө гаргасныг УИХ хүлээн зөвшөөрсөн” гэж заажээ. Энэ нь “УИХ-ын гишүүний бүрэн эрх хугацаанаас өмнө дуусгавар болох” гэсэн үндсэн зүйлийн заалт юм.

Өөрөөр хэлбэл УИХ-ын гишүүн Ж.Мөнхбат хүндэтгэн үзэх шалтгаанаар чөлөөлөгдөх өргөдлөө өөрөө өгсөн тул одоо УИХ-аар хэлэлцэх ёстой.

Хэрэв прокурорын байгууллагаас гишүүний бүрэн эрхийг түдгэлзүүлэх санал УИХ-д хүргүүлсэн бол процесс нь хуулийн хугацаатай. Харин өөрөө өргөдөл өгсөн тохиолдолд ХУГАЦААГҮЙ байна. Тэгэхээр хаврын чуулган нээгдсэний дараа эл асуудлыг хэлэлцэж таарах нь.Хэлэлцэхийн тулд:

• Төрийн байгуулалтын байнгын хороогоор Ж.Мөнхбатын өргөдлийг хэлэлцэнэ
• Олонхын саналаар дэмжсэн бол ТББХ-ы дэмжсэн саналын томъёоллоор УИХ хэлэлцэнэ
• Улмаар УИХ-ын гишүүдийн олонх дэмжсэн бол Ж.Мөнхбатын гишүүний бүрэн эрх хугацаанаасаа өмнө дуусгавар болно гэсэн үг юм.

Иймд Ж.Мөнхбатын хүсэлт хаврын чуулганы нээлтийн дараа хаврын улс төрийг эхлүүлэх нь.