“Эрдэнэс Монгол”-д ажиллах 88 хүний сүүлчийн сонгон шалгаруулалтыг С.Наранцогт захирал хийнэ

“Эрдэнэс Монгол” компанийн хүний нөөцийг нээлттэй сонгон шалгаруулах шалгалт Нийслэлийн төв номын санд үргэлжилж байна. Шалгалт өглөө 08.30-д эхэлсэн юм. Одоо гурав дахь шалгалт үргэлжилж байна. Хамгийн түрүүнд ахлах менежерийн ажилд горилогчид шалгалт өгсөн юм. нийт 234 хүн бүртгүүлснээс 161 хүн шалгалтад оржээ. Гурван хүн хоцорсон тул шалгалтад орж чадаагүй. Дараа нь менежерийн албан тушаалд горилогчид шалгалтаа өгсөн. 2 дахь шалгалтад 135 хүн орох ёстой байснаас 97, гурав дахь шалгалтад 134 хүн орох ёстой байснаас ердөө 97 хүн иржээ. Ирэх долоо хоногт тестийн шалгалтаас өндөр оноо авсан иргэд ярилцлагын шалгалтаа өгнө. Гурван хүний бүрэлдэхүүнтэй баг ярилцлага авна. Ямар албан тушаал байхаас хамааран ярилцлага авах хүмүүс өөрчлөгдөх юм. Менежер, ахлах менежерийн албан тушаалт горилогчийн шалгалтад томоохон компаниудын гүйцэтгэх захирал оролцох болжээ. Ингээд тест болон ярилцлагын шалгалтаас нийлбэр дүнгээр хамгийн өндөр оноо авсан шалгуулагчдыг “Эрдэнэс Монгол” компанийн гүйцэтгэх захирал С.Наранцогтод танилцуулна. 88 ажлын байранд ажиллах нийт 440 хүний материалтай С.Наранцогт захирал танилцана. Тэднээс чухам хэнийг ажилд авах эцсийн шийдвэрийг С.Наранцогт захирал дангаараа гаргах юм. Нээлттэй сонгон шалгаруулалтын дараа ирэх сараас тус компани шинэ бүрэлдэхүүн, шинэ бүтцээр ажиллаж эхэлнэ.