УИХ дахь Хөгжлийн Банкны хянан шалгах түр хорооноос зохион байгуулж буй Нотлох баримтыг шинжлэн судлах сонсгол үргэлжилж байна. Өнөөдрийн сонсголд 15 компанийн зээлтэй холбогдуулан 57 гэрчийг дуудсан юм.
Энэ үеэр "Вестерн холд" ХХК-ийн асуудалтай холбогдуулан дуудсан хоёр гол гэрч ирээгүй болохыг
УИХ-ын Тамгын газрын хяналт шалгалтын хэлтсийн дарга Ж.Лхагвасүрэн хэлсэн юм.
Тэрбээр "Вестерн холд" ХХК-ийн ерөнхий захирал С.Балжиннямыг гэрчээр дуудсан ч нэгдүгээр сарын 13-28-ны өдрийн хооронд гадаад улсад албан томилолтоор ажиллах болсон тул сонсголд оролцох боломжгүй гэсэн албан бичгийг, захиалсан билетийн хуулбартай хамт ирүүлсэн.
Мөн тус компанитай хамаарал бүхий "Алтай трест" компанийн гүйцэтгэх захирал С.Баянчулууныг гэрчээр дуудсан боловч мөн ирээгүй. Нэгдүгээр сарын 14-28-ны өдрийг дуустал Вьетнам улсад хувийн ажлаар зорчих болсон тулд сонсголд оролцох боломжгүй гэх албан бичгийг, билет захиалгын хуудсыг хавсаргасан” гэв.
Тэгвэл "Вестерн холд" ХХК-ийн ерөнхий захирал С.Балжинням, "Алтай трест" компанийн гүйцэтгэх захирал С.Баянчулуун нар нь УИХ-ын гишүүн Зам, тээврийн хөгжлийн сайд С.Бямбацогтын төрсөн дүү ажээ.
"Вестерн холд" ХХК нь "Ховд эко цемент" төсөл хэрэгжүүлэхээр 2018 онд 26.8 сая ам.долларын зээл авсан бөгөөд зээлийн ангилал нь хэвийн байгааг шинжээч хэллээ.
