Сургуулийн орчинд хоол үйлдвэрлэл, үйлчилгээний стандартыг шинээр боловсруулж байна
Сургуулийн орчин дахь хоол үйлдвэрлэл, үйлчилгээний стандартыг шинээр боловсруулж байгааг Боловсрол, Шинжлэх Ухааны Яам (БШУЯ)-наас мэдээллээ.
1978 оноос хойш өнөөдрийг хүртэл боловсролын салбарт 156 стандартыг батлан хэрэгжүүлж байна. Үүний дийлэнх нь сургалтын хөтөлбөр, сурах бичигтэй холбоотой. Одоогоор боловсролын салбарт мөрдөгдөж буй стандартаас 23-ыг нь хүчингүй болгох шаардлагатай байгаа аж.
Боловсролын багц хуулийн төслийг УИХ-аар хэлэлцүүлэхээр өргөн барьсан бөгөөд тус хуульд стандартын шинэчлэл хийх зохицуулалтуудыг тусгасан байна. Тиймээс хуулийн төслийг хэлэлцэн баталж, үүний дараа стандартуудыг шинэчлэх ажлыг эрчимжүүлэх юм. Тэр дундаа сургуулийн орчин дахь хоол үйлдвэрлэл үйлчилгээ, тэгш хамруулан сургах орчин нөхцөлтэй холбоотой стандартыг шинээр боловсруулах, батлуулах, мөрдүүлэх нь нэн тэргүүний зорилт болсныг БШУЯ-наас онцлов. Тиймээс стандартыг олон улсын түвшинд нийцүүлэх, хэрэгжилтийг сайжруулах зорилгоор стандарттай холбоотой төрөөс баримтлах бодлого, стандарт ба хөгжил үндэсний хөтөлбөр боловсруулах, стандартын тухай хуульд нэмэлт өөрчлөлт оруулахаар төлөвлөн ажиллаж байгааг шадар сайд С.Амарсайхан тус яаманд өчигдөр ажиллах үеэрээ хэлэв.
