"Ройтерс" зэрэг гадаадын хэвлэл мэдээллийн хэрэгслүүд болон Украины ерөнхийлөгч Владимир Зеленскийн орон нутгийн цагаар 3-ны өдөр мэдэгдсэнээр, Украины зүүн хэсгийн Полтавад Оросын арми агаарын цохилт өгсний улмаас 51 хүн амь үрэгдэж, 250 гаруй хүн шархадсан байна. Полтава нь ОХУ-ын Белгород, Украины Харьковын хилээс 110 км-ийн зайд оршдог.
Гадаадын хэвлэл мэдээллийнхэн агаарын цохилтыг 2022 оны хоёрдугаар сард дайн эхэлснээс хойшхи хамгийн олон хүний аминд хүрсэн халдлагын нэг гэж мэдээлэлж байна.
Украины Ерөнхийлөгч Володимир Зеленский "Орос новшнууд энэ халдлагын хариуцлагыг хүлээх нь дамжиггүй. Терроризмыг зогсоох эрх мэдэл бүхий дэлхийн бүх хүмүүст уриалж байна. Агаарын довтолгооноос хамгаалах систем, пуужингууд Укрианд хэрэгтэй болохоос агуулахад биш" хэмээн хэлжээ.
Украины засгийн газар "Хохирлын хэмжээ одоогийн мэдэгдэж байснаас их байж магадгүй" гэж мэдэгдэж, агаарын довтолгооноос хамгаалах зэвсгээр хангаж, Оросын эсрэг алсын тусгалын зэвсэг хэрэглэхийг зөвшөөрөхийг барууны орнуудад удаа дараа уриалсан. Гэвч барууны орнууд тодорхой хариу өгөөгүй хэвээр байна.
Энэ үеэр олон улсын хэвлэлүүд болон Өмнөд солонгосын томоохон хэвлэл болох YTN news "Украин дахь халдлагын үеэр ОХУ-ын Ерөнхийлөгч В.Путин Монгол Улсад хийх төрийн айлчлалаа товлосон ёсоороо эхлүүллээ. Хоёр улс эдийн засгийн хамтын ажиллагаа, тэр дундаа эрчим хүчний хамтын ажиллагааг онцолсон байна. Монгол улс эрчим хүч, түлшний хувьд ОХУ-аас ихээхэн хамааралтай" хэмээн мэдээллээд байна.
Эх сурвалж: YTN
Орчуулсан: Э.Тунгалаг
