Монгол бурхны шашны Төв-Гандантэгчэнлин хийдийн Тэргүүн их хамба, 30 дахь Хамба номун хан, гэвш лхаарамба Д.Жавзандорж ламыг ширээнд залах ёслол хүндэтгэлийн үйл ажиллагаа болж байна.
ХХХ Хамба номун хан, гэвш Лхаарамба Д.Жавзандорж:
-Авралт багш гурван эрдэнэ дор бишрэнгүйгээр мөргөе. Өнөөдрийн ёслолд морилон саатсан Монгол Улсын Их хурлын дарга Г.Занданшатар, эрхэм УИХ-ын гишүүд, ЗГ-ын гишүүд, төр нийгмийн зүтгэлтнүүд, бурхан шашны хутагт хувилгаад, гэвш лхаарамба, гавж, хийдүүдийн хамба ламууд, гадаад орны Элчин сайдууд, хүндэт зочид төлөөлөгч, сүсэгтэн олон та бүхэндээ 17 дугаар жарны Үзэсгэлэн болгогч хэмээх усан туулай жилийн өвлийн тэргүүн сарын шинийн 5-ны билэгт сайн өдрийн мэндийг өргөн дэвшүүлье.
Монголын бурхан шашинтны төв Гандантэгчинлэн хийдийн тэргүүн их Хамба, ХХХ Хамба номун хан хэмээх эрхэм хүндтэй, нэн хариуцлагатай шашин номын албан тушаалд сонгогдон томилогдлоо. Эрхэм хүндэт та бүхэнтэй хамтран уламжлалт бурхны шашин соёлоо түгээн дэлгэрүүлэх их үйлсийн төлөө хичээн зүтгэхээ илэрхийлж байна.
Хамба Номун хан Д.Чойжамц:
Миний явж ирсэн замнал хүнд хэцүү бэрх үе байсан. Гандантэгчэглин хийдээ дээш нь татаарай гэж надад захисан юм. Тэр захиасны ёсоор хийдээ сайн сайхан болгох гэж явлаа. Сая миний хийсэн ажил гэж зөндөө л юм дурдлаа. Ганц хүн хийнэ гэж байдаггүй. Энэ олон хуврагууд, лам хуврагийн чуулган, сүсэгтэн олон, засаг төр болон гадаад дотоодын тусламжаар бүх ажил бүтсэн юм шүү дээ.
Шинэ хамба ажлаа сайн хийнэ гэж бодож байгаа. Энэтхэгийн сургуульд очоод нэлээд сайн сурч байгааг нь дуулаад алсдаа шашиндаа тустай хүн болох нь дээ гэж боддог байсан.
