АНУ-ын Чикаго хотноо 15 дахь удаагаа зохион байгуулагдаж буй “Chicago's Asian Pop Up Cinema” фестиваль жүжигчин Б.Амарсайханы кино урлагт 24 жил ажиллаж, кино урлагт оруулж буй хувь нэмэр, уран бүтээлчийн замналыг нь онцлон үнэлж, Монгол улсаас анх удаагаа Netflix-н Marco Polo цувралд дүр бүтээж, мөн олон улсад Монголын орчин цагийн киног таниулж явааг нь онцлон уг шагналыг олгож буйгаа фестивалийн захирал, хатагтай Софиа Вон Бочиа дурдсан юм.
Үүний дараагаар жүжигчин Б.Амарсайханы найруулагчийн хувьд анхны бүтээл болох “Эргэж ирэхгүй намар” (Harvest moon) киног үзсэн үзэгчид найруулагч, жүжигчин Б.Амарсайхан болон продюсер С.Уран нартай киноны тухай болон Монголын ахуй соёл, өв соёлын онцлогийн талаар дэлгэрэнгүй асуулт, хариулт өрнүүлэв.
Тус арга хэмжээний нээлтэд Чикаго хотын “Гийнгоо” морин хуурын чуулгын хүүхдүүд болон Монгол Улсаас АНУ-ын Чикаго хотод суугаа Консулын газрын төлөөлөл оролцов. Киног суугаа орны үзэгчид болон Чикаго хот орчимд амьдардаг монгол иргэд хүрэлцэн ирж үзэн танхим дүүрэн алга ташилтаар үнэлж байлаа.
