Өнөөдрийн УИХ-ын чуулганы нэгдсэн хуралдаанаар УИХ нэг танхимтай, 126 гишүүнтэй байх санал батлагдсан.
Энэ үеэр эсрэг байр суурьтай, эсрэг кноп дарсан УИХ-ын гишүүн, Барилга хот байгуулалтын сайд Ц.Даваасүрэнгийн байр суурийг хүргэж байна.
Тэрбээр “Үндсэн хуулийн өөрчлөлтийн асуудалд маш анхааралтай хандуулах учиртай. Тойрогтоо хоёр удаа, 900 гаруй сонгогчидтой уулзалт хийхэд дийлэнх нь Үндсэн хуулийн өөрчлөлт, гишүүдийн тоог нэмэхийг дэмжсэнгүй.
Намын жагсаалтыг ч дэмжээгүй. Намын жагсаалтаар олонд нэр хүнд муутай, янз бүрийн хэрэг төвөгт холбогдсон, сонгогдох боломжгүй улс гарч ирэх шалтгаан болно гэж үзэж байна.
Тиймээс иргэдийн дийлэнх тэгж үзэж байгаа учир миний хувьд Үндсэн хуулийн өөрчлөлтийг дэмжих боломжгүй. Миний уулзсан сонгогчдоос 5, 6 хүн л гишүүдийн тоон дээр эргэлзсэн байр суурь илэрхийлсэн. Сонгууль болоод очихоороо “та бүхний төлөө ясаа дундартал зүтгэнэ” гэчихээд өнөөдөр би тэдний сонгох эрхэнд халдаж чадахгүй.
Үндсэн хуулийн журмын тухай хуулийн 5/4/2-т Үндсэн хуульд өөрчлөлт оруулахдаа “Нам бүлгийн ашиг сонирхлыг илэрхийлсэн байж болохгүй” гэж байдаг. Өөрөөр хэлбэл, иргэдийн сонгох эрх буурч байгаа учраас би энийг хэлж байна.
Одоогийн Үндсэн хуульд иргэд сонгох эрх нь давуу, шууд сонгодог гишүүдээ. Тиймээс намын эрх мэдэл, сонирхол илэрхийлэгдэж байна гэж харж байна. Нөгөө талаар иргэний үндсэн эрх бол сонгох эрх. Энэ эрхийг дордуулж болохгүй.
Ер нь иргэдийн хэлж байгаа асуудал бол гурван жилд гурван удаа өөрчлөлт орж байгаа явдал.
2019, саяхан бид бас давхар дээлтэй Үндсэн хуулийн цэцийн шийдвэрийн дагуу хоёрдахиа оруулчихсан, одоо гуравдахиа оруулж байна. Хожмын нэг өдөр мөн л Үндсэн хуульд өөрчлөлт оруулах гээд яриа битгий гараасай. Өнөөдрийн бид нараар Монголын төр зогсчихгүй. Дараа дараагийн үеүд гарч ирнэ. Тэд арай л дутуу байсан юм, одоо гүйцээе гэж магадгүй учраас ингэж хэлж байна. Төрийн албанд бүх насаараа ажилласан хүний хувьд төрөө дээдлэх ёс журмаас хоёр нүүр гаргаж чадахгүй” гэлээ.
