Засгийн газрын хуралдааны шийдвэрийг ХНХ-ын сайд Х.Булгантуяа танилцуулж байна.
Тэрбээр "Боловсрол, эрүүл мэнд, шинжлэх ухаан, соёл урлагийн салбарынхны суурь цалинг 1 сая төгрөг болгоно. Мөн төрийн нийтлэг үйлчилгээний албан хаагчдын цалин 560 мянган төгрөг байгааг 750 мянган төгрөг болгоно.
Эдгээр нэмэгдлийг долдугаар сарын 1-нээс нэмнэ. Тэтгэвэр мөн нэмнэ. Гэхдээ буруу ойлголт байгааг залруулах хэрэгтэй. Ахмадууд тэтгэврийн зөрүүг арилгах хүсэлт их ирүүлдэг. Итгэлцүүрийн улмаас тэтгэвэрт ялгаатай байдал үүссэн. 2014 онд итгэлцүүрийг өөрчилсөн тул тэтгэврийн зөрүүг ойртуулахад 260 орчим мянган ахмад хамрагдана. Үүнд 395 орчим тэрбум зарцуулагдахаар байна. Мөн асаргааны тэтгэмжийг нэмнэ. Хөгжлийн бэрхшээлтэй хүүхдээ асардаг, байнгын асаргаа шаардлагатай иргэд, өрх толгойлсон ээж/аавуудад 280 мянган төгрөг олгодог байсан. Хамгийн сүүлд 2020 онд нэмсэн. Халамжийн зардал 100 орчим тэрбум төгрөг зарцуулна" гэлээ.
Үргэлжлүүлэн, "Иргэд хүсвэл хүүхдийн мөнгөнөөс татгалзаж болно. Энэ тохиолдолд тухайн хүүхдийн мөнгө "Хүүхдийн төлөө санд" шилжих юм. Төрийн болон орон нутгийн олон амралт байдаг. Олон улсын хүүхдийн Найрамдал зуслангийн эрхийн бичиг маш их эрэлттэй байдаг. Иймд төрийн мэдлийн амралтын газарт хүүхдүүд амрах нөхцлийг бүрдүүлнэ. Найрамдал зуслангийн баг эдгээр амралтын газарт мэргэжил арга зүйн зөвлөгөө өгнө" хэмээв.
