-Хилийн зурваст орсон модыг цэвэрлэгээнд орох мод хэмээн нэрийддэг аж. Энэ модыг аврах боломж байх уу?-
Монгол Улсын хил 8252.6 километр үргэлжилдэг бөгөөд үүнээс 34.9 хувь нь байгаль, газар зүйн онцлогоос шалтгаалан өргөст торон саад барих боломжгүй, 43.7 хувь нь өргөст торон саад байхгүй, 21.4 хувь нь өргөст торон саадаар төхөөрөмжлөгдсөн байна.
2016 оноос хойш мөр хянах зурвас, ойн ба шороон зурвас 807.5 км, өргөст торон саад 558.2 километр нүхэн саад, 198 километр төмөр, спираль болон 127.7 километр туслах торон саад шинээр байгуулсан гэх мэдээллийг Хил хамгаалах ерөнхий газраас хийж байсан байна.
Хил хамгаалах газраас энэ жил хилийн зурвасыг шинэчлэхдээ хилийн зөрчил их гардаг газруудыг буюу Жишээлбэл, Сэлэнгэ, Увс аймгийн хилийн дагуух ой бүхий газарт хилийн зурвас татах, шинэчлэх ажлыг хийхээр төлөвлөж байгаа юм.
Бид хилийн инженерийн байгууламжийг зөвхөн өргөст торон саадаар ойлгодог. Гэтэл мөр хянах зурвас, нүхэн шуудуу, үл үзэгдэх торон саад зэрэг хилээ хамгаалах янз бүрийн байгууламжийг байгуулдаг байна.
Ой бүхий газарт хилийн зурвас татах, шинэчлэх ажлыг энэ удаад онцолж байна. Энэ жил Сэлэнгэ аймагт хийгдэх хилийн зурваст ой бүхий газар таарч байгаад орон нутгийнхны зүгээс модыг тайраад, үндсээр нь сугалаад л хаячихдаг буюу дахин ашигладаггүй байдлыг таслан зогсоож болдоггүй юм уу гэдэг асуудлыг тавьж байна.
Энэ модыг цэвэрлэгээнд орох хэмээн нэрийддэг аж. Аливааг үр ашигтай ашиглах гэдэг нь хилийн зурвас дахь ой модны асуудал дээр ч яригдаж болно. Тэгвэл хилийн зурваст “цэвэрлэгдсэн мод”-ыг нийслэлд авчрах боломж нөхцөл байх уу?
Хаа сайгүй ногоон байгууламж, мод арчилгаа, мод тарих үйл явц өрнөж байгаа энэ үед ой бүхий газрын хилийн зурвас дахь мод, бутаа нийслэлдээ авчирч ургуулбал “Модоо аврах сайн үйлс” болно.
