УИХ-ын гишүүн А.Адъяасүрэн нүүрсний хулгай болон авлигын хэргээр яллагдагчаар татагдаад буй. Тэрбээр УИХ-д орж ирэхээсээ өмнө БНХАУ-ын “Хуафа Ложиситик” компанитай хамтарч “Ульган сар транс”, “Сан тээвэр групп”, “Баян говь транс”, “Тэнгри транс групп” ХХК-иудыг эзэмшдэг байжээ. Эдгээр компаниуд бол АТҮТ-ийг авлигадсан нүүрс тээврийн компаниуд юм.
-А.АДЪЯАСҮРЭН 2022 ОНД КОМПАНИУДАА ӨӨР ХҮНД ШИЛЖҮҮЛЖ, ТУН УДАЛГҮЙ ТУХАЙН КОМПАНИУД НЬ АТҮТ-ИЙНХНИЙГ АВЛИГАДСАН АСУУДАЛД ХОЛБОГДОВ-
Энд нэр дурдагсан “Сан тээвэр групп”, “Ульган сар транс, “Тэнгри транс групп”, “Баян говь транс” компаниудыг Лхагвасүрэнгийн Зандаръяа гэгч эзэмшиж, өмчилдөг. Мөн “Ганбат хөлөг” ХХК, “ПД төв ази” ХХК, “Голд ландровер транс” ХХК зэрэг компаниудтай. Эдгээр нь дороо охин компаниудтай. Тухайлбал, “Голд ландровер транс” ХХК нь “Дэвжих хулан” ХХК, “ПД төв ази” ХХК нь “Монголиан житун интернэйшнл ложистик” ХХК зэргээр салбарлана.
За энэ ч яахав, эрхэм гишүүнд хамааралтай гэх нэр бүхий компаниуд 2021, 2022 онд шинэхэн эзэдтэй болсон байгаа нь анхаарал татаж байна.
Ийм олон компанийн өмчлөгч, эзэмшигч,гүйцэтгэх захирлыг ганцхан хормын дотор сольж өөрчилснийг улсын бүртгэлийн баримт бичгээс харж болно.
Дээр нэр дурдагдсан Л.Зандаръяа “Ульган сар транс” ХХК-ийн эзэмшигч ч, захирлаар нь Б.Эрдэнэчулуун гэгч ажилладаг. Б.Эрдэнэчулуун нь “Шинэ өртөө транс”, Оргил Өртөө ложистик ХХК-иудыг мөн хариуцдаг.
Дараагийн компани болох “Тэнгри транс групп”-ийг Л.Зандаръяагаас гадна Ж.Отгонтуяа, Ч.Наранцэцэг нар өмчилдөг. Харин захирлаар нь А.Номинхүслэн гэгч ажилладаг.
“Баян говь транс” дээр дахиад л энэ хүмүүсийн нэр бий. Нэмэгдээд өмчлөгчөөр Т.Оюунбилэг, гүйцэтгэх захирлаар нь Ё.Болормаа гэгч л шинэчлэгдэн орж ирнэ. Өөрөөр хэлбэл УИХ-ын гишүүн А.Адъяасүрэн нүүрсний компаниудынхаа нэр, эзэмшигчийг ингэж өөрчилжээ.
-А.АДЪЯАСҮРЭН ӨӨРИЙН ХАМААРЛЫН ХАМАГ Л КОМПАНИА БУСДЫН НЭР ДЭЭР ШИЛЖҮҮЛЖЭЭ-
Үүгээр зогсохгүй балларуудсан балгаа арилгах гэж компаниудынхаа нэрийг хүртэл сольсон талаарх мэдээлэл байна. Тухайлбал, “Хишиг сайхан ундрах”, “Азын хишиг дэлгэрэх”, “Ивээл сар транс”, “Дайлингийн хишиг тээвэр” ХХК болгож өөрчилсөн талаар эх сурвалж онцолсон.
Мөн энэ компаниудын эзэмшигчээр Британийн Виржинийн аралд бүртгэлтэй “Freindship and Fortune S Corporation” гэж компанийг бүртгүүлсэн байдаг аж.
Дээрх нэр дурдагдсан компаниуд л гэхэд 2018 онд үүсгэн байгуулагдсан хэрнээ 2021 онд “Freindship and Fortune S Corporation” гэж компанийг хувьцаа эзэмшигчээр бүртгүүлсэн. Захирлаар нь БНХАУ-ын иргэн Wuyudalai гэгч ажилладаг бол, эцсийн өмчлөгч нь бүр энэ сарын эхээр тодорчээ.
Эдгээр компаниудын Өмнөговь аймгийн Ханбогд сумын Цагаанхад дахь нүүрс тээврийн үйл ажиллагааг А.Адъяасүрэнгийн үүсгэн байгуулсан гэх “Премиум кастомс” ХХК хариуцдаг. Энийг нь илчлэхэд мөн л төвөгтэй. Учир нь энэ компанийг мөн л Хятад иргэдэд хариуцуулсан.
Гэхдээ компанийн улсын бүртгэлийн хаяг, байршлыг солихоо мартсан байдаг. Тодруулбал, дээрх “Премиум кастомс” ХХК А.Адъяасүрэнгийн төрсөн дүү А.Оддэлгэрийн “Ноба тур” ХХК-ийн Улаанбаатар хот, Чингэлтэй дүүрэг, II хороо, 40 мянгат,27 дугаар байр, 18 тоот гэх хаяг дээр бүртгэлтэй байдаг. Энэ нь А.Адъяасүрэн нүүрс тээврийн компаниудаа гадны хүмүүсээр өнгөлөн далдалж, далдаас удирддаг болов уу гэсэн хардлагыг төрүүлж байна.
Тэгвэл “Премиум кастомс” ХХК-ийн хувьцаа эзэмшигчээр 2021 онд бүртгэгдсэн “Шилмэл газар” ХХК нь “Пүшинмон” ХХК, “Соронзонговь” ХХК-иудыг эзэмшдэг гэхчлэн цааш хөвөрнө.
ЦЭГ.МН
