Монгол Улсын Ерөнхийлөгч У.Хүрэлсүх Хүүхдийн баярыг угтан Олон хүүхэд төрүүлж өсгөсөн эхийг урамшуулах тухай хууль болон Монгол Улсын Үндсэн хуульд заасан бүрэн эрхийнхээ хүрээнд өнөөдрөөс эхлэн алдарт эхчүүдэд одон гардуулж байна.
Энэ үеэр "Маск" продакшны жүжигчин Г.Чулуунцэцэг өнөөдөр алдарт эхийн хоёрдугаар одон авчээ.
Тэрбээр "Юун түрүүнд хүүхдүүдийг минь хараад өгчихдөг хоёр ээждээ болон ханьдаа баярлалаа. Ээжүүдийн хувьд ар амьдрал амар тайван, сайхан бол л аз жаргал байдаг. Монголынхоо бүх сайхан ээж нартаа эх үрсийн баярын мэнд хүргэе. Урт насалж удаан жаргаарай" хэмээн сэтгэгдлээ илэрхийлэв.
Холбогдох хуульд зургаан хүүхэд төрүүлж өсгөсөн эхийг I зэргийн одонгоор, дөрвөн хүүхэд төрүүлж өсгөсөн эхийг II зэргийн одонгоор шагнана гэж заасан.
