Цахим хөгжил, харилцаа холбооны яам үндэсний монгол бичгийн хэрэглээг дэмжихэд чиглэсэн стандарт, монгол бичгийн технологийн бэлэн байдлыг бүрдүүлэх чиглэлээр ажиллаж байна. Энэ хүрээнд цахим системийн гарын байрлалын болон бусад стандартуудыг холбогдох байгууллагуудтай хамтран батлуулж, монгол бичгийн цахим кодыг боловсронгуй болгох чиглэлээр гадаад, дотоодын байгууллагууд, эрдэмтэн судлаачидтай хамтарч байгаа юм.
Монгол Улс 2025 оноос хос бичигт шилжих хуулийн зорилтыг амжилттай хэрэгжүүлэхэд нэн тэргүүнд цахим орчны хэрэглээ, мэдээлэл боловсруулах үйл ажиллагааны суурь технологийн шийдлийг бүрдүүлэх шаардлагатай. Түүнчлэн нийтийн мэдээллийн дэд бүтэцтэй хоршин ажиллах үндэсний хэл, бичгийн цахим системүүдийг Монгол Улсын үндэсний стандартуудад нийцүүлэх, дэлхийн томоохон үйлдлийн системүүдэд нэгтгэх ажлыг Хэлний бодлогын үндэсний зөвлөлтэй хамтран хэрэгжүүлж эхлээд байна.
“Монгол хэл, бичгийн асуудал, шийдэл” Үндэсний чуулганаар эдгээр ажлуудаа танилцуулж, оролцогчдод амжилт хүсэж буйгаа илэрхийллээ.
