Соёлын бүтээлч үйлдвэрлэлийг дэмжих тухай хуулийн төслийг хэлэлцэхийг гишүүдийн олонх дэмжсэн тул анхны хэлэлцүүлэгт бэлтгүүлэхээр холбогдох байнгын хороонд шилжүүллээ.
Үргэлжлүүлэн Төсвийн тухай хуульд нэмэлт оруулах тухай хууль болон хамт өргөн мэдүүлсэн хуулийн төслүүдийг хэлэлцэж, мөн анхны хэлэлцүүлэгт бэлтгүүлэхээр Төсвийн байнгын хороонд шилжүүлэв.
Чуулганы үдээс өмнөх хуралдааны өмнөхөн Аж, ахуй нэгжийн албан татварын тухай хуульд нэмэлт өөрчлөлт оруулах тухай хуулийн төслийг хэлэлцэв.
Дээрх асуудалтай холбоотойгоор УИХ-ын гишүүн Д.Өнөрболор, Эрчим хүчний сайд Б.Чойжилсүрэн нар өөр хоорондоо үг хаялцаж, ширүүн маргаан өрнүүлсэн юм.
УИХ-ЫН ГИШҮҮН Д.ӨНӨРБОЛОР “Шинэ сэргэлтийн бодлого болон хот хөдөөгийн сэргэлт, боомтын сэргэлтийн хүрээнд чиглэж байгаа эрчим хүчний эх үүсвэрийг нэмэгдүүлэх бодлогын том агуулгыг бол дэмжиж байгаа.
Харин нэг гараараар иргэдийн амьдралын чанарыг сайжруулж, агаарын бохирдлыг бууруулна гэж баахан хөрөнгө зарчихаад нөгөө гараараа үүнийхээ эсрэг Улаанбаатарт утаа үйлдвэрлэхээр орж ирж байгааг дэмжихгүй. Нөгөө 200 яндан чинь 1000 болохоор орж ирж байна.
Дөнгөж сайжруулсан шахмал түлшрүү шилжээд байгаа ч энэ асуудлаас болж буцаад түүхий нүүрсрүүгээ шилжих болвол яах вэ. Эрчим хүчний яам бодлогоосоо ухарч асуудал оруулж ирж байна.
Одоо энэ утааны асуудалтай хот, хөдөөгийн ялгамжтай байдлаар хандацгаая. Хэрэв ялгамжтай байдлаар шийдэгдэхгүй яг энэ чигээрээ батлагдвал, өнөөдөр Монгол Улсын хувьд олон улсын гэрээ конвециос буцаж байгаа алхам болно.
Яагаад Эрчим хүчний яам технологийн шийдлийн олон арван боломжууд дэлхий дээр байсаар байхад 1.5МВт-аас дээш нүүрсний эх үүсвэр бүхий дулааны станцуудыг Улаанбаатар хотод утаа үйлдвэрлэхээр оруулж ирээд байгаа юм бэ” гэв.
ЭРЧИМ ХҮЧНИЙ САЙД Б.ЧОЙЖИЛСҮРЭН “Д.Өнөрболор гишүүн буруу ойлгоод байна. 1.5МВт хүчин чадалтай дулааны станц барьсан тохиолдолд гаалийн татвараас чөлөөлье, НӨАТ-ыг нь 4 жил хойшлуулъя гэдэг асуудал яриад байна. Аж, ахуй нэгжийн орлогын албан татвараар дотооддоо тоног төхөөрөмж үйлдвэрлэвэл 90 хувийн хөнгөлөлт үзүүлэх тухай өөрчлөлт орж ирж байгаа.
Одоо яг бодит байдал дээр ОХУ-аас БНХАУ руу нийлүүлэгдэх хийн хоолой хамгийн сайндаа, хамгийн хурдандаа, хамгийн эерэгээр бодоход ажил хэрэг болох нь 2029, 2030 он болчихоод байна. Энэ хооронд бид хүссэнч, эс хүссэнч нүүрсээ түлэхээс өөр арга алга.
Дулаан өвөлжих ёстой. Дээр нь утаагүй өвөлжих ёстой. Тиймээс энэ хооронд бид 200 яндан зэрэг ажлаад агаар мандалд хорт хий ялгаруулах эсвэл 200 янданг цуглуулаад нэг жижиг дулааны станц болгоод, шүүлтүүр тавиад, бүрэн чадалтай болсон тохиолдолд 10 дахин буурах аргыг хэрэгжүүлэх гэж байна.
200 айлыг 20 айлтай тэнцэх хэмжээний л болгоно гэсэн үг. Нүүрс түлж байгаа тохиолдолд утааг бүрэн шийдэж чадахгүй. Аргаа барсан арга нь үнэн. Энэ байдлаар бид дундын шилжилт хийгээд 2030 онд бүрэн газтай болох үетэйгээ золгоё гэсэн бодлого л байгаа юм.
Би хоёрч удаа тайлбарласан Д.Өнөрболор дутуу ойлгоод байгаа юм уу, ямар шалтгаан байгааг ойлгохгүй байна” гэлээ.
