УИХ-ын 2023.06.16-ны өдрийн буюу өчигдрийн хуралдаанаар Боловсролын Ерөнхий хуулийн эхний хэлэлцүүлэг хийгдсэн юм.
Тэр утгаараа салбарын сайд Л.Энх-Амгалан юуг онцлох бол гэдэг сонин байлаа. Тэрбээр "Боловсролын салбарын шинэчлэлийн гол асуудал бол засаглалын шинэчлэл гэж харж байгаа. Сүүлийн 30 жил бид боловсролыг яаж улстөржүүлсний хор уршгийг яаж амсаж байна.
БЗС-аас зээл авч гадаадад суралцаж байгаа хүүхдүүдийн ихэнх нь хувийн өндөр төлбөртэй сургууль төгссөн. Эргээд боловсрол чинь өөрөө ядуу хоосон, анги давхаргын тогтолцоог бий болгочихсон байна.
Өнөөдөр хот, хөдөөгийн сургуулийн ялгаа, хувийн болон төрийн сургуулийн ялгааг арилгахын хамгийн гол зүйл нь засаглал, менежментийн асуудал.
Тэгээд 30 жил боловсролоор тоглочихоод манай хуулийн гол үзэл баримтлалаас илүү зүгээр сумын засаг дарга, аймгийн засаг дарга нар сургууль, цэцэрлэгийн захирал, эрхлэгчдийг хуучнаараа томилдог болно гэвэл би энэ хуулиа эргүүлж татъя.
Энэ танхимд телевиз харахаараа өөр юм ярьдаг, сонгогдсон аймаг, сум, дүүрэг дээрээ очихоороо улстөрийн өнцөг, намын өнцгөөс харж ханддаг ийм сэтгэлгээтэй байх юм бол Монголын боловсрол хэзээ ч өөрчлөгдөхгүй юм байна. Хэзээ ч хот хөдөөгийн боловсролын ялгаа арилахгүй юм байна. Хэзээ ч төрийн болон хувийн сургуулийн ялгаа арилахгүй юм байна.
Аль ч оронд боловсролын тогтолцоогоо шинэчлэх үйл явц явагддаг. Босоо тогтолцоо бол менежментийн ухаан, менежментийн бодлогын шийдлүүдээс шалтгаалж оновчтой болдог. Боловсролын салбарын шинэчлэлээр хийх 5, 6-хан бодлогын томоохон асуудлууд дээр ухралт хиймээргүй байна" гэхчлэн санал хэлж байлаа.
