Хөгжлийн банк чанаргүй, эрсдэл өндөртэй зээлийн эргэн төлөлтийг шүүхийн шийдвэрийн дагуу барьцаа хөрөнгөөр хангуулж байгаа. Улмаар тус банкны мэдэлд бүрэн шилжсэн эхний ээлжийн 18 үл хөдлөх хөрөнгийг зарж борлуулах ажил эхэлсэн талаар бид мэдээлсэн.
Капитал банкны удирдлагууд авсан зээлийнхээ баримтыг хүртэл устгасан байж болзошгүй нөхцөл байдлын талаар өнгөрсөн удаад Хөгжлийн банкны сонсголын үеэр мэдэгдэж байв.
Олон мянган иргэдийг хохироосон банк дампууруулсан хэрэгт алдарт УИХ-ын гишүүн асан Б.Ундармаа уснаас хуурай гарч 40 сая төгрөгөөр торгуулаад өнгөрсөн бол түүний нөхөр А.Ариунболд нарын хэдэн хүн тэнсэн харгалзах ял төдийхнөөр өнгөрснийг Монголчууд санаж байгаа биз ээ.
Тэгвэл тэд, тэдэндтэй хамаарал бүхий компаниуд Хөгжлийн банк төдийгүй Эрүүл мэндийн даатгалын сан, Нийгмийн даатгалын сан, ХААДС гээд олон сангуудаас зээл авсан ч өр төлбөрөө барагдуулаагүй өдийг хүрсэн жишээ ганц нэгээр тогтохгүй.
А.Ариунболд, Б.Ундармаа хоёрын хамаарал бүхий компаниудын авсан зээл хэдэн тэрбумаар яригдаж байгаа өнөө үед Хөгжлийн банкны 54.4 тэрбум төгрөгийн өрийн авлага болох “Даймонд центр”-ийн 594 сая төгрөгөөр худалдан борлуулагдахад бэлэн болжээ.
Эрүүгийн хэрэг хянан шийдвэрлэх ажиллагааны явцад тус банкны удирдлагаар ажиллаж байсан н.Ариунболд гэгч Хөгжлийн банкны хохирлыг тодорхой үл хөдлөх хөрөнгүүдэд гэрээ хийж барагдуулсны нэг нь энэ.
Харин нөгөө барилга нь алдарт Гантиг вилла хотхон. MУХБ-аас “Монгол мах экспо” ХХК-д олгосон зээлийн төлбөр болон “Капитал банк” ХХК-д олгосон дамжуулан зээлийн авлагын төлбөрийг төлж барагдуулах зорилгоор хураан авсан. Гэрээгээр "Эй Би Трейд Групп" ХХК нь тус төслийн ажлыг хийж гүйцэтгэж улсын комисст хүлээлгэн өгөх үүрэг хүлээсэн ба худалдан борлуулах ажиллагааг мөн хариуцан ажиллаж байна.
Тус хотхоныг Хөгжлийн банк өөрийн эзэмшилд бүртгэн авснаар 86.6 тэрбум төгрөгийн чанаргүй зээл эргэн төлөгдөх боломж бүрдэнэ гэж үзсэн юм.
Эргэн сануулахад, “Гантиг вилла” цогцолборыг УИХ-ын гишүүн асан Б.Ундармаатай хамааралтай буюу нэгдмэл сонирхолтой этгээдийн компани барьсан гэж АТГ-аас хэвлэлийн хурал хийж байв.
