Төсвийн тухай хуульд нэмэлт өөрчлөлт оруулах тухай хуулийг хоёр дахь хэлэлцүүлэгт шилжүүлэв.
Чуулганы хуралдааны үеэр Д.Цогтбаатар “Эдийн засагт нааштай өөрчлөлт ороод Төсвийн тодотгол орж ирж байгаад баяртай байгаа.
2022 оны нэгдүгээр сард Тэтгэвэр хэлэлцэж байх үед төрийн өмчийн аж ахуй нэгжүүдэд хориг тавьж, цааш нь тоог нь нэмэхгүй, царцаахгүй бол нийгэмд хамгийн болохгүй юмнууд чинь гарна гэж байсан. Хүндрэлүүдийн эхний дохио л орж ирж байхад ингэж ярьж байсан. Товчхондоо, төрийн өмчит аж ахуй нэгжүүдэд чинь гол хулгай, дээрэм, хамаатан саднаараа гэрээ контакт хийдэг гэхчлэн зүйл явж байна. Мөн хувийн аж ахуй эрхлэгчдийн ДНБ-нд эзлэх хувь хэмжээ багасчихсан байгаа гэж хэлсэн. Түүнчлэн үүнд төрийн болон хөдөө орон нутгуудын сангуудыг чинь оруулсангүй гэж байсан. Яагаад гэвэл надаа мэдээллээ өгөөгүй. Өгөхгүй байсных нь учир сая гарч ирж байна. Энэ сангууд чинь ямар завхарсан, хулгай, дээрэмтэй юм бэ гэдэг нь. Ийм байхад дөнгөж саяхан хөдөө аж ахуйн бас нэг төрийн компани байгуулж л байгаа байхгүй юу. Тэгэхээр энэ Төсвийн тодотголд хувийн салбараа яаж дэмжих гэж байгаа вэ.
Хоёрдугаарт, түүхий эдийн экспорт овоо сэргэсэн байгаа.Энэ утгаараа экспортод чиглэсэн ажлыг дэмжинэ тал дээр яг ямар санхүүгийн хөшүүрэг, арга хэмжээнүүд туссан бэ. Мөнгөтэй, баян болж байгаа юм бол идэж уугаад дуусах биш, үйлдвэрлэж өсгөөд явахыг эдийн засгийн ухаан гэж хэлдэг.
Гуравдугаарт, экспортыг дэмжих, импортыг орлох бодлого хоёрыг төр, засаг нийлж байгаад нэг дор яриад байдаг байсан. Ичиж үхмээр. Энэ чинь хоорондоо бие биенийгээ үгүйсгэсэн, өрсөлдсөн бодлого байдаг. Харин одоо тэрнээс нэг юм ангижирч салсан байна лээ” гэв.
Үргэлжлүүлэн, тэрбээр “Сүхбаатар дүүргийн 16 дугаар хороонд баригдаж байгаа барилга дуусаагүй, мөнгөгүй гацчихсан байгаад байна. Тэнд барих ёстой барилгаа барихгүй байж дүүргийн төв хэсэгт хэд хэдэн хороон дээр баахан барилга бариад хүмүүсийг дургүйцлийг хүргээд байна. Тэгэхээр манай Сүхбаатар дүүргийн төвд худлаа үнэн барилга барихгүйгээр тайван байлгаад өг ” хэмээсэн юм.
