Төсвийн тухай хуульд нэмэлт өөрчлөлт оруулах тухай хуулийг хэлэлцэж байна.
УИХ-ын гишүүн Д.Ганбат “Та нарын асуулт, хариултыг сонслоо. Ямар уйтгартай юм бэ. Комминуст намын хурал явж байгаа юм шиг л байх юм.
30 жилийн дараа төсөв нэмэгдлээ гээд л бүгд уйлчих гээд л. Юу өөрчлөгдөх юм. Энэ амьдрал ахуйгаа хар. Дэлгүүр хоршоо ордог л байлгүй. Уул уурхай чинь тийм сайн ажиллаад байгаа юм бол “Эрдэнэс тавантолгой”-н ногдол ашгаа ард түмэнд өг л дөө. Баахан л сэргэлт яриад байх юм. Хэзээ ч сэргэх юм. Боловсролын хуулиас эхлээд шинэчлэл юу ч үнэртэхгүй байна. Байгалийн баялгийг та нар ямар өөрсдөөсөө өгч байгаа биш. Ирээдүйн өв сангийн мөнгө яасан. Аваад хэрэглэчихсэн л биз дээ. Та нар өөрсдийгөө магтаад бяцхан залилан шиг юм хийгээд байх юм. Гараад иргэдээс асуу. Амьдрал хэцүү байгаа. Хүүхдийн мөнгийг та нар өгч байгаа юм биш шүү дээ. Байгалийн баялгаасаа л өгч байгаа зүйл шүү” гэлээ.
УИХ-ын дэд дарга Л.Мөнхбаатар “Түүний асуултад Сангийн сайд Б.Жавхлан ойртуулаад хариулаарай” гэв.
Сангийн сайд Б.Жавхлан “Д.Ганбат гишүүний ярьсан зүйлийн аль хэсэг асуулт байсан бэ. Сайн ойлгосонгүй уучлаарай. Шинэ сэргэлтийн бодлого амжилттай хэрэгжиж байгаа болохоор л та бид хоёр төсвийн тодотгол хийх гээд сууж байна шүү дээ. Энэ сэргэлт тун удахгүй үүнээс ч илүү боломж бидэнд нээж өгнө гэж бодож байгаа” хэмээв.
УИХ-ын чуулган үргэлжилж байна.
